कोरोना महासंकट : रायगड जिल्ह्यातील रुग्ण संख्या वाढली तरी जिल्हा रेड झोनमध्ये जाणार नाही ; या जिल्हाधिकारी निधी चौधरी :
कोरोना महासंकट : रायगड जिल्ह्यातील रुग्ण संख्या वाढली तरी जिल्हा रेड झोनमध्ये जाणार नाही ; या जिल्हाधिकारी निधी चौधरी :
पनवेल (बातमी दीपा वाघमारे): मे महिन्यात जिल्ह्यातील करोनाबाधितांची संख्या वाढत असली तरी जिल्हा सध्यातरी रेड झोनमध्ये जाणार नाही, असे रायगडच्या जिल्हाधिकारी निधी चौधरी यांनी स्पष्ट केले आहे. जिल्ह्यातील एकूण ५७ टक्के रुग्णांनी करोनावर मात केली आहे. सध्या करोनाबाधित असलेल्या ३२१ रुग्णांपैकी केवळ ३ जणांना ऑक्सिजन पुरवठ्यावर ठेवण्यात आले आहे. त्यामुळे रुग्ण संख्यात जरी वाढत होत असली तरी घाबरून जाण्याचे कारण नाही असंही जिल्हाधिकारी कार्यालयात आयोजित पत्रकार परीषदेत त्यांनी व्यक्त केले आहे.
मे महिन्यात जिल्ह्यातील ९५ हजार नागरिक दाखल झाले आहेत. यातील बहुतांश नागरिक हे मुंबई, ठाणे, पुणे, आणि सूरत परिसरातील आहेत. या सर्वांवर प्रशासनाकडून लक्ष्य आहे. महिन्याच्या सुरवातीला जिल्ह्यात १०५ करोनाबाधित होते. आज हा आकडा ८४० वर पोहोचला आहे. मात्र, रुग्णांची संख्या जरी वाढली असली तरी कोणी घाबरून जाण्याचे कारण नाही. या सर्वांवर यशस्वी उपचार सुरु आहेत. जिल्ह्यातील ४८२ जणांनी करोनावर मात केली आहे. सापडणारे बहुतांश रुग्ण हे मुंबईच्या परिसरातून आलेले आहेत. त्याच्यावर आरोग्य यंत्रणा आणि प्रशासकीय यंत्रणांचे लक्ष्य आहे. जिल्ह्यातील कोरोना रुग्णांची संख्या वाढली तरीही रायगड जिल्हा रेड झोनमध्ये जाणार नाही.
जिल्ह्यात करोना विषाणूबाधितांच्या उपचारासाठी ३ स्तरीय आरोग्य यंत्रणा उभारण्यात आली आहे. यात कोव्हिड -१९ केअर सेंटर, डेडिकेटेड कोव्हिड -१९ सेंटर आणि कोव्हिड -१९ हॉस्पिटल्सचा समावेश आहे. जिल्ह्यातील प्रत्येक तालुक्यात कोव्हिड -१९ केअर सेंटर उभारण्याचे काम पूर्ण होत आले आहे. अलिबाग, पेण, श्रीवर्धन, कर्जत, माणगाव येथे डेडिकेटेड कोव्हिड -१९ चे सेंटर्स सुरु करण्यात आली आहेत. तर पनवेल आणि कामोठे येथे कोव्हिड -१९ हॉस्पिटल्स कार्यरत केली आहेत. सध्या पनवेल, कामोठे आणि अलिबाग येथे कोरोना विषाणूच्या रुग्णांवर उपचार सुरु आहेत.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.