कोरोना महासंकट : पनवेल ओरियन मॉल मध्ये कापडाचे दुकान चालू ठेवून पालिकेच्या नियमाचे उल्लंघन :
पनवेल ओरियन मॉल मध्ये शुक्रवारी दुकान सुरु करण्यास परवनागी नसताना कापडाचे दुकान चालू ठेवून मनपाने ठरवून दिलेल्या नियमाचे उल्लंघन केले असल्याने गुन्हा दाखल करण्यात आला आहे.
पनवेल (बातमी किरण पवार) : पालिका आयुक्तांच्या आदेशाने लाॅकडाऊनच्या कालावधीत काही दुकाने विशिष्ट दिवशी उघडण्याची काही अटींवर परवानगी दिली गेली होती. कोरोना विषाणूचा प्रकोप कमी व्हावा यासाठी लाॅकडाऊन देखील वाढविण्यात आलेला आहे. परंतु दैनंदिन जीवनदेखील त्यामुळे प्रभावित होत आहे. यासाठी शासनाने काही बाबतीत सवलती देण्याचा अधिकार त्या त्या स्थानिक प्राधिकाऱ्यांना दिलेला आहे. पनवेल महानगरपालिका क्षेत्रात आयुक्त हे सक्षम अधिकारी आहेत. त्यानुसार एकल दुकानांना विशिष्ट दिवशी उघडण्यास परवानगी दिली होती.
परंतु याकडे दुर्लक्ष करून काही दुकानदार वैयक्तिक फायद्यासाठी कायद्याचा भंग करताना दिसुन आले. पनवेल येथील ओरियन मॉल मध्ये शुक्रवारी दुकान सुरु करण्यास परवनागी नसताना कापडाचे दुकान चालू ठेवून मनपाने ठरवून दिलेल्या नियमाचे उल्लंघन केले असल्याने गुन्हा दाखल करण्यात आला आहे. उपायुक्त जमीर लेंगरेकर यांचे मार्गदर्शनाखाली प्रभाग समिती "ड" चे प्रभाग अधिकारी दशरथ भंडारी यांनी आयुक्त सुधाकर देशमुख यांच्या आदेशाने सदरचे दुकान बंद करून त्यांच्यावर भारतीय दंड संहिता १८६० च्या कलम १८८ नुसार गुन्हा दाखल केला आहे. पनवेल महानगरपालिका हद्दीत जर कोणी लाॅकडाऊनच्या आदेशांचे उल्लंघन करताना आढळल्यास त्यांचेवर सख्त कारवाई करण्यात येईल. अशी माहिती उपायुक्त जमीर लेंगरेकर यांनी वृत्तास दिली.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.