कोरोना अपडेट: किडनी व्याधी रुग्णांच्या दिमतीला ४ डायलिसिस मशिन्स सज्ज..!!!
कल्याण-डोंबिवली(प्रतिनिधि/कल्पेश सोनार): कोव्हीडच्या महाभयंकर परिस्थितीत डायलिसिस रुग्णांचे होत असलेल्या हालाखीची दैनिक पुढारीने २३ जुलैच्या अंकामध्ये कल्याण-डोंबिवलीत डायलिसिस रुग्णांचे हाल या मथळ्याखाली सविस्तर वृत्त प्रसारित केले होते. या वृत्ताची रोटरी क्लब ऑफ डोंबिवली ईस्ट सहसंचालित रोटरी विकास ट्रस्टने दखल घेतली. शनिवारी क्लबच्या वर्धापन दिनाचे औचित्य साधून ट्रस्टच्यावतीने रोटरी डायलिसिस सेंटरचे उद्घाटन केले. या क्लबने किडनी व्याधी रुग्णांच्या दिमतीला ४ मशिन्स सज्ज झाली असून या मशिन्सद्वारे सेवा देखिल सुरू करण्यात आली आहे.
रोटरीचे माजी प्रांतपाल सुप्रसिद्ध बालरोग तज्ज्ञ डॉ. उल्हास कोल्हटकर यांच्याहस्ते या सेंटरचे लोकार्पण करण्यात आले. रोटरी क्लब ऑफ डोंबिवली ईस्टच्यावतीने ४ डायलिसिस मशिन्स एमआयडीसीतील आश्रय चॅरिटेबल ट्रस्ट हॉस्पिटलला प्रदान करण्यात आली. यावेळी रोटरी क्लब ऑफ डोंबिवली ईस्टचे अध्यक्ष संतोष भणगे, क्लब सेक्रेटरी संदीप येल्लूरकर यांच्यासह ज्येष्ठ रोटेरिअन उपस्थित होते. रो. सुशिल सोनी, आचार्य ग्रुपचे रो. आनंद आचार्य, डीके फ्लॅग फाऊंडेशनचे सर्वेसर्वा फ्लॅगमॅन डॉ. राकेश बक्षी, ग्लोब ग्रुपचे रो. माधव सिंह व कल्याण-डोंबिवली रनर्स ग्रुपचे या उपक्रमात मोलाचे योगदान आहे.
लाॅकडाऊनची सर्व बंधने पाळून रोटरी अध्यक्ष संतोष भणगे यांनी यानिमित्ताने क्लबच्या एका अत्यंत महत्वाकांक्षी वैद्यकीय उपक्रमाचे स्वप्न पूर्ण केले. आश्रय ट्रस्टच्यावतीने डॉ. अरुण पाटील यांनी कार्यक्रमाचे सूत्रसंचालन केले. तसेच आश्रय ट्रस्टच्यावतीने रोटरीचे या अत्यंत निकडीच्या समाजोपयोगी उपक्रमाबद्दल आभार मानले होते. याप्रसंगी डॉ. अरुण पाटील म्हणाले, आश्रय हाॅस्पिटलमध्ये २० पेक्षा अधिक नविन रुग्ण डायलिसिस उपचार घेत आहेत. हॉस्पिटलमध्ये रुग्ण संख्या देखिल वाढली आहे. रोटरीने ४ नविन मशीन दिल्यामुळे डायलिसिस रुग्णांना खूपच फायदा होणार आहे. तसेच या रुग्णांची होणारी गैरसोय कमी आहे. गेल्या ३ दिवसांत कोव्हीड निगेटिव्ह असणाऱ्या व डायलायसिसची गरज असणाऱ्या रुग्णांना आश्रयमध्ये सेवा मिळू शकेल. त्यामुळे गरजू रुग्णांनी त्याचा जरूर फायदा घ्यावा, असेही आवाहन डॉ. पाटील यांनी यावेळी बोलताना केले.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.