न्यूज अपडेट :- अतिरिक्त आयुक्त श्रीम. सुजाता ढोले यांचा नेरूळ विभागात अचानक पाहणी दौरा..!
नवी मुंबई (प्रतिनिधि) :- 'मिशन बिगीन अगेन' अंतर्गत लॉकडाऊनमध्ये टप्प्याटप्प्याने शिथीलता आणत विविध सेवांवरील निर्बंध खुले करण्यात आलेले असून नवरात्रौत्सव, दसरा, दिवाळी असा उत्सवी कालावधी लक्षात घेता संसर्गातून पसरणारा कोरोनाचा वाढता प्रादुर्भाव रोखण्यासाठी सर्वांनी कमालीची सतर्कता बाळगणे गरजेचे आहे. अद्याप कोव्हीड 19 रोगावर कोणतीही लस अथवा औषध सापडलेले नसल्याने मास्कचा नियमित वापर, सतत हात धुणे व एकमेकांपासून सुरक्षित अंतर राखणे या प्रतिबंधात्मक उपाययोजनांची काटेकोरपणे अंमलबजावणी करणे हीच खरी बचावाची ढाल आहे. तथापि नागरिकांकडून याबाबत तितकेसे गांभीर्य राखले जात नसल्याच्या तक्रारी वारंवार प्राप्त होत आहेत.
या अनुषंगाने अतिरिक्त आयुक्त श्रीम. सुजाता ढोले यांनी प्रशासन व परिमंडळ 1 चे उपआयुक्त श्री. दादासाहेब चाबुकस्वार आणि घनकचरा व्यवस्थापन विभागाचे उपआयुक्त डॉ. बाबासाहेब राजळे यांच्यासमवेत नेरूळ विभागातील विविध ठिकाणच्या मार्केट भागाला अचानक भेट देऊन प्रत्यक्ष स्थितीची पाहणी केली.
अतिरिक्त आयुक्तांच्या या पूर्वसूचना न देता केलेल्या अचानक पाहणी दौ-यामुळे तेथील विक्रेते आणि नागरिकांची एकच गडबड उडाली. या दौ-यात मास्क न घालता वावरणा-या नागरिकांशी संवाद साधत अतिरिक्त आयुक्त यांनी त्यांना मास्कचे महत्व सांगत समज दिली तसेच दुकानदारांनाही मास्क न घालता येणा-या नागरिकांना दुकानात प्रवेश न देण्याच्या सूचना केल्या. त्याचप्रमाणे सोशल डिस्टन्सींगचे पालन करण्याकडेही लक्ष देण्याचे सूचित केले.
सेक्टर 1 नेरूळ, शिरवणे मार्केट तसेच नेरूळ स्टेशन लगतच्या परिसरातील प्रत्यक्ष परिस्थितीची पाहणी करीत अतिरिक्त आयुक्त श्रीम. सुजाता ढोले यांनी नेरूळ विभागाचे सहा. आयुक्त श्री. अनुप डेरे यांना दूरध्वनी करून मार्केट परिसरातील फेरीवाल्यांवर नियंत्रण आणणेबाबत त्वरित व नियमित कारवाईचे निर्देश दिले. त्याचप्रमाणे मास्क, सोशल डिस्टिन्सींग असे सुरक्षेचे नियम न पाळता सार्वजनिक आरोग्य हिताला बाधा आणणा-या बेजबाबदार नागरिकांवर दंडात्मक कारवाईच्या सूचना केल्या. अशाच प्रकारच्या सूचना इतर सर्व विभाग अधिका-यांना द्याव्यात असेही अतिरिक्त आयुक्तांनी परिमंडळ उपआयुक्तांना सूचित केले.
सध्या उत्सव कालावधी असला तरी कोरोना प्रसाराचा धोका ओळखून नागरिकांनी उत्सव साजरे करताना आरोग्य सुरक्षेच्या बाबींचे काटेकोर पालन करावे महापालिका आयुक्त श्री. अभिजीत बांगर यांच्या आवाहनास अनुसरून आपल्यामुळे कोरोनाचा प्रसार होणार नाही याची नागरिकांनी सुरक्षा नियमांचे पालन करून काळजी घ्यावी असे या पाहणी दौ-यादरम्यान अतिरिक्त आयुक्त श्रीम. सुजाता ढोले यांनी सूचित केले.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.