न्यूज अपडेट: "साहित्यवेदी" संकेतस्थळाचे मराठी भाषामंत्री सुभाष देसाई यांच्या हस्ते अनावरण..!!
मराठी भाषेचा आजपर्यंतचा प्रवास, कोशसंपदा, सुलेखनकला व्यवसाय, युवा साहित्यकार आढावा, सर्व वाङमयीन नियतकालिकांची ओळख व कार्य, महाराष्ट्र बोलींचे नमुने व परिचय, महाराष्ट्रातील शताब्दी ग्रंथालयांचे एकत्रित दालन, अनेक साहित्यकारांच्या निवासभेटीची परिक्रमा अशा अनोख्या विषयांनी साहित्याचा यज्ञ संपन्न करण्यासाठी सज्ज "साहित्यवेदी" असलेले हे पहिलेच व नावीन्यपूर्ण असे संकेतस्थळ आहे.
यावेळी बोलतांना मा. भाषामंत्री सुभाष देसाई म्हणाले, “साहित्यवेदी या संकेतस्थळामुळे मराठी भाषा व साहित्य यांची सर्व अंगे एकत्रित मिळतील. तंत्रज्ञानाच्या साहाय्याने मराठीतील ज्ञान सर्वांपर्यंत पोहोचवणे व जगातील सर्व मराठी भाषिकांना जोडणे त्यामुळे शक्य होईल. भाषा मंत्रालयातर्फे जागतिक मंच तयार केला जात आहे, त्याच्याशी हे संकेतस्थळ जोडून घेता येईल.
हे संकेतस्थळ शालेय स्तर ते संशोधक-अभ्यासक यांच्यासाठी उपयुक्त होणार आहे. मराठी भाषा आणि साहित्याला उज्ज्वल परंपरा आहे. एक दिवस भाषादिन साजरा करून त्याचे महत्त्व अधोरेखित करण्यापेक्षा वर्षभर ते सतत दृष्टिक्षेपात राहावे, या हेतूने www.sahityavedi.com या संकेतस्थळाची निर्मिती करण्यात आली आहे.
मराठी भाषेविषयीचे डॉ. गणेश देवी, डॉ. नीलिमा गुंडी, हरी नरके, डॉ. विद्या देवधर यांच्यासह अनेकांचे अभ्यासपूर्ण लेख तसेच विविध विषयांचा अंतर्भाव दृक्‌श्राव्य फितींसह यात केला आहे. मराठी भाषेचे जतन व संवर्धन करण्यासाठी अध्यापकांनी केलेला हा स्तुत्य उपक्रम आहे.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.