न्यूज अपडेट: नवी मुंबई शहरातील ज्वेल ऑफ नवी मुंबई उद्यानामधून येणाऱ्या दुर्गंधीचा नागरिकांना त्रास:
सर्वाधिक उद्याने असणाऱ्या शहरांमध्ये नवी मुंबई शहराचे नाव कायम अग्रस्थानी असते. १२० हून अधिक उद्यानांचा समावेश असलेल्या नवी मुंबई शहरात महापालिकेने नेरुळ येथे ज्वेल ऑफ नवी हे सर्व सोयीसुविधांनी समृद्ध असे भव्य उद्यान काही वर्षांपूर्वी विकसित केले आहे. तलावाच्या सभोवताली सुमारे अडीच किलोमीटर अंतर असणारा जॉगिंग ट्रॅक, ओपन जिम, प्रसाधनगृह, पार्किंग, आधुनिक विद्युत व्यवस्था अशा विविध सुविधा या ठिकाणी उपलब्ध करून देण्यात आल्या आहेत. भव्य जॉगिंग ट्रॅकमुळे तरुणाईबरोबर, वृद्धांचे व्यायाम करण्यासाठी येण्याचे प्रमाणदेखील मोठे आहे.
मात्र गेल्या काही महिन्यांपासून या उद्यानातील समस्या वाढत असल्याचे पाहायला मिळत आहेत. तलावात सोडण्यात आलेल्या मलवाहिन्यांच्या सांडपाण्यामुळे परिसरात दुर्गंधी पसरली असून नागरिकांच्या आरोग्याचा प्रश्न निर्माण झाला आहे. दरम्यान, कोरोना प्रादुर्भाव वाढल्याने सद्यस्थितीत उद्याने पूर्णतः बंद ठेवण्यात आली आहेत. मात्र गेल्या कित्येक महिन्यांपासून उद्यानातील प्लास्टिक कचरा तसेच दुर्गंधी याबाबत नागरिकांकडून महापालिकेचे लक्ष वेधून घेण्याचा प्रयत्न करण्यात आला होता. मात्र महापालिका प्रशासनाने याची दखल न घेतल्याने नागरिक नाराजी व्यक्त करीत आहेत.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.