न्यूज अपडेट: सरकारी व खाजगी कोविड हॉस्पिटल मध्ये ICU विभागात सीसी टीव्ही कॅमेरा लावण्यात यावे अशी मागणी रुपालीताई शिंदे यांनी केली:
न्यूज अपडेट: सरकारी व खाजगी कोविड हॉस्पिटल मध्ये ICU विभागात सीसी टीव्ही कॅमेरा लावण्यात यावे अशी मागणी रुपालीताई शिंदे यांनी केली:
पनवेल (प्रतिनिधी) :- तात्काळ कोविड सरकारी आणि खाजगी हॉस्पिटल मधील कोविड ICU विभागात सीसी टीव्ही कॅमेरा बसवण्याचे आदेश देणे बाबत विनंती मा. सौ रुपाली ताई यांनी मेल द्वारा मागणी केली आहे, आज देशामध्ये कोरोनाचा प्रार्दुभाव मोठ्या प्रमाणात वाढत चाललेला आहे. महाराष्ट्र राज्यात तर कोरोना विषाणुने हाहाकार माजवला आहे. तसेच नवी मुंबई, मुंबई या ठिकाणी देखील कोरोनाने हैदोस घातला आहे. तसेच कोरोना संसर्गाच्या दुसऱ्या लाटेमुळे रुग्णांसाठी बेड, रेमडेसिवर, ऑक्सीजन व औषधांसाठी रुग्णांच्या नातेवाईकांना मोठ्या प्रमाणात आपल्या घरच्या व्यक्तींना वाचविण्यासाठी पळापळ धावपळ सुरू आहे. त्यातच सन 2020 पासून कोरोना विषाणूने जिल्ह्यातील अनेक सामान्य गरीब जनतेचे कमरडे मोडलेले असून, हातात पैसे नसल्याने अनेक मध्यमवर्गीय गरीब जनता सरकारी व खाजगी रुग्णालयांची वाट धरीत आहेत. पण याच सरकारी व खाजगी रुग्णालयात कोविड वर उपचार घेत असलेल्या रुग्णाची स्थिती अत्यंत बिकट होत असल्याचे दिसून येत आहे.
कोरोनाग्रस्त लोकांना रुग्णालयात बेड, ऑक्सीजन, कोविड प्लाझ्मा व रेमडेसिवर उपलब्ध न झाल्याने, अनेकांना आपल्या प्राणास मुकावे लागत आहे. तर याच कोविड ICU विभागात कश्या प्रकारे कोरोनावर उपचार करण्यात येतात याची माहिती आता नागरिकांना, हॉस्पिटल मध्ये येणाऱ्या रुग्णांच्या नातेवाईकांना असणे गरजेचे आहे. रुग्णांच्या नातेवाईकांना त्यांना भेटता येत नाही, त्यांना धड पाहता येत नाही. आपला रुग्ण बरा आहे कि कसा आहे याची नातेवाईकांना माहीतही नसते. 20 - 25 दिवस कोरोनावर उपचार करून तरीदेखील रुग्ण आपला प्राण सोडत आहे, का आणि कश्या मुळे? हे जाणून घेणे अंत्यत गरजेचे आहे. कोविड विभागात उपचार घेत असलेला रुग्ण उपचाराला कशाप्रकारे प्रतिसाद देत आहे? डॉक्टर कश्या पद्धतीने उपचार करीत आहे? कोणत्या रुग्णाला काही त्रास जाणवत आहे का किंवा त्याच्या प्रकृती मध्ये काही बिघाड होत आहे का? हे बाहेर वाट बघणाऱ्या त्या रुग्णांच्या नातेवाईकांना माहीत देखिल नसते, त्यात रुग्ण जास्त त्यामुळे डॉक्टरांनाही संबंधित नातेवाईकांना रुग्णांच्या परिस्थिती विषयी सांगणे अवघड झाले आहे.
अश्यावेळी क्रांतिज्योत महिला विकास फॉउंडेशन च्या वतीने आपण सदर कोविड हॉस्पिटलांमध्ये कोविड विभागात सीसी टीव्ही कॅमेरा त्वरित लावावा, जेणेकरून आत चाललेल्या घडामोडी रुग्णांच्या नातेवाईकांना बाहेर लावलेल्या टीव्हीवर पाहता येतील.. आपला रुग्ण बरा आहे, किंवा त्याची प्रकृती खालावत चालली आहे, याविषयी नातेवाईकांना माहिती होईल. आपण याकडे. विषयाकडे गांभीर्याने लक्ष द्यावे व लवकरात लवकर सदर हॉस्पिटल्सला सी सी टीव्ही ची सोय करावी असे प्रशासनाने आदेश द्यावेत ही अशी विनंती सौ. रूपालीताई शिंदे यांनी केली आहे.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.