न्यूज अपडेट: नवीन पनवेल येथील शाळेची फी न भरल्याने 300 विद्यार्थी केले ऑनलाईन शिक्षणापासून वंचित:
● नवीन पनवेल येथील मुजोर शाळेने 300 विद्यार्थी ऑनलाईन शिक्षणापासून केले वंचित, फी साठी जाब विचारायला गेलेल्या पालकांना शाळेच्या आवारात कोंडलं
● कोव्हीडच्या या महामारीच्या काळात शाळेची फी वाढ न करण्याचा राज्य सरकारने आदेश दिला असताना देखील बर्याच शाळांकडून याला केराची टोपली दाखवली जात आहे
पनवेल (प्रतिनिधी) :- कोव्हीडच्या या महामारीच्या काळात शाळेची फी वाढ न करण्याचा राज्य सरकारने आदेश दिला असताना अनेक शाळांकडून याला केराची टोपली दाखवली जात आहे. नवीन पनवेल येथील सेंट जोसेफ शाळेने तर फी न भरणाऱ्या 300 विद्यार्थ्यांना ॲानलाईन शिक्षणातून बाहेर काढल्याचा आरोप पालकांनी केलाय. याबाबत पालकांनी 26 जून रोजी सकाळी 8 वाजता शाळेत जाऊन विचारपूस केली असता शाळा प्रशासनाकडून पालकांनाच शाळेच्या आवारात बंद करून ठेवले गेले. फी बाबत काही तो निर्णय घ्या आणि नंतरच शाळेच्या बाहेर जा, असा अजब प्रकार शाळेने केला आहे.
काय प्रकार घडला शाळेत..??
शाळेच्या मुख्य गेटलाच कुलूप लावल्याने शाळेत गेलेल्या पालकांना बाहेर जाता येत नव्हते. शाळेच्या या दादागिरी विरोधात काही पालकांनी गेटबाहेर आंदोलन करण्यास सुरुवात केली. त्यानंतर हा सर्वप्रकार पोलीस ठाण्यापर्यंत पोहोचला. पोलीसांनी शाळेत येऊन हस्तक्षेप करुन पालकांना बाहेर काढले. कोरोना काळात लोकांच्या नोकऱ्या गेल्या असताना शाळा फी वाढवत असल्याचा आरोप पालकवर्गाने केलाय. दरम्यान याबाबत शाळेची बाजू देखील जाणण्याचा प्रयत्न केला पण त्यांनी प्रतिक्रिया देण्यास नकार दिला आहे.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.