न्यूज अपडेट: कष्ट करण्याची तयारी असेल तरच कला शाखा निवडा - प्रा. जगदीश संसारे..!!
मुंबई (प्रतिनिधी/ गुरुदत्त वाकदेकर) :- ‘‘कष्टाळू, कष्ट टाळू व कसे टाळू ह्या तीन प्रवृत्तीमध्ये विद्यार्थ्यांनी आपण कोणत्या प्रवृत्तीत आहोत, हे ठरवा मगच कला शाखेकडे वळा. आज दहावी व बारावीला कमी मार्क्स मिळाले म्हणून कला शाखेकडे विद्यार्थी वळतात तो काळ मागे पडला आहे. आज कला शाखेत नव्वद टक्क्यांना देखील प्रवेश मिळत नाही. जे विज्ञान आणि वाणिज्य शाखेतील विद्यार्थी करू शकत नाही ते कला शाखेतील विद्यार्थी करू शकतात. कला शाखेतील विद्यार्थ्यांकडे करिअर निवडीचे प्रचंड मार्ग आहेत. साहित्य, कला, नाटय, शिक्षक, प्राध्यापक, संशोधक, लेखक, पटकथा लेखक, समीक्षक, ग्रंथपाल, भाषाशास्त्रज्ञ, माहितीतज्ञ, नाणेशास्त्र, इतिहासतज्ञ, टंकलेखक, राजकीयतज्ञ, अर्थविश्लेषक, समुपदेशक, प्रशासकीय सेवा, मानवी हक्क तज्ञ, पर्यटन मार्गदर्शक, वस्तूसंग्रहालय तज्ञ, जाहिरात लेखन वगैरे वगैरे अशा नाना संधी फक्त कला शाखेतच उपलब्ध आहेत.’’ असे उद्गार ‘संधी कला शाखेतील’ मराठी विषयात पदवी घेणाऱ्या विद्यार्थींनीना मार्गदर्शनपर व्याख्याना प्रसंगी सेंट जोसेफ महाविद्यालयातील मराठी विभाग प्रमुख प्रा. जगदीश संसारे ह्यांनी काढले. मराठी भाषेत पदवी घेत आहोत म्हणून स्वतः विद्यार्थ्यांपेक्षा त्यांचे कौटुंबिय अधिक त्रासलेले असतात. मराठी भाषा आता संपत चालली आहे ह्या भ्रमातच आपण अधिक असतो. हाच भ्रम दूर करण्यासाठी सेवा मंडळ एज्यूकेशन सोसायटी संचालित श्रीमती एम. एम. पी. शाह महिला स्वायत्त महाविद्यालयातील मराठी विभाग आयोजित ‘संधी कला शाखेतील’ ह्या विषयावर मराठी विभागाने एक मार्गदर्शपर व्याख्यान पालक आणि विद्यार्थीनी ह्या दोघोंसाठी आयोजिले होते. प्रा. जगदीश सरांचे व्याख्यान ऐकल्यानंतर मात्र सारे भ्रम नष्ट झाले. विद्यार्थी आणि पालक दोन्ही मंडळी समाधानी झाले हेच खरे ह्या मार्गदर्शनपर व्याख्यानाचे फलित म्हणायला हवे.
कार्यक्रमाचे सूत्रसंचालन मराठी विभागातील डॉ. रश्मी शेटये-तुपे ह्यांनी केले. तर प्रमुख मार्गदर्शकांचे स्वागत मराठी विभाग प्रमुख प्रा. वसंत पानसरे ह्यांनी केले. सदर कार्यक्रमास प्राचार्य डॉ. लीना राजे मॅडम ह्यांनी शुभेच्छा दिल्या. कार्यक्रमाच्या अंती एक प्रेरणादायी गीत कु. माधवी पवार हिने सादर केले. सदर कार्यक्रमास महाविद्यालयातील अन्य प्राध्यापक, पालकवर्ग आणि विद्यार्थींनी उपस्थित होत्या. कोरोनाच्या प्रार्दूभाव असल्यामुळे कार्यक्रम आभासी पद्धतीने पार पडला.
महत्त्वाची टीप : सर्वांनी आपली काळजी घ्या, घरी सुरक्षित रहा, पौष्टिक आहार घ्या, सतत गरम पाणी प्या, तसेच दररोज नियमित व्यायम करा आणि कोरोना पासुन दहा हात लांब रहा.
